الخميس، 19 أبريل 2012

استراحة غداء

طلعت من المكتب الساعة 3 بعد الظهر على نية اني أكل اشي بعد ما اكتشفت اني جوعان و مش مجمع. طبعا في عندي 3-4 خيارات من المطاعم اللي حوالينا (الله يجعلها مطاعم) . و زي كل مرة ماشي و مش مقرر شو بدي ادضلغس  - كلمة معناها انو بدي اكل و مشا فراقة شو- المهم وصلت للمحل اللي في النصيب و برضو مش عارف شو بدي. بس لما شفت 3 شباب واقفين على الدور ليطلبو سندويشات على السريع قلت خلص هادي هي , خليني أعطيها شندويشات من الاشي اللي مش عارف شو هو.

استنيت الشبات لما خلصو طبعا بعد ما قززو أهلي على اساس انهم بفهمو بطعمة تمهم . وبلشو حطلي بندورة اه و حط شوية خس و بلاش مايونيز .. اه اه بليز توستد. توستد! الله يرحم جدك اللي مش عارف ازا لحق الكستنة على الصوبة ولا لأ :).

وبعد ما جهزت سندويشاتهم خربوها و اخدو بيبسسي. لأ واللي بضحك بطلعلك واحد فيهم بقول لا لا انا ما بشرب غازات. والله! من متى؟ الله يوفقك يا سيدي!
كل هاد الفيلم أخد ربع ساعة وانا واقف بتابع مش للإهتمام بس كنت زهقان و بدي اشي اتسلى فيه .و مع هيك قلت لتبع المطعم اعطيني زيهم بالزبط بس شو قال بدي اغير فرحت طلبتها بخبز ابيض بدال اسمر - يا سيدي علي و انا ديزيشن ميكر :)


سيبونا من كل هاللت و العجن اللي فوق. شو يعني انو انا بحب هاي الأكلة و ما بحب هديك؟ طب شو يعني أكلة صحية و أكلة لأ؟

طب احنا ليش بنغير الاكلة أو المطعم كل مرة؟ هل هية قصة فسيولوجية الجسم انه عشان التنويع ولا القصة قصة وين انا برتاح في الاكل! طيب نفس الاكلة الي بنحبها بفرق طعمها لما ناكلها لوحدنا عن لما ناكلها مع حدن بنعرفه, بنحبه, او بنرتاح معه! انا بشوف انه هاد هو التفسير. المكان و الزمان و الاشخاص همه اللي بيعطو الطعم للاكل. و اكيد أهم عامل هو الميزانية. يعني وقت الطفر تتلاشي كل هذه العوامل و بناكل هوا و بنعطيها فلافل او قلاية بندورة في البيت مع صحابك (هاد الحكي للعزابية و المغتربين :)

خلصت السندويشة الغريبة اللي طلبتها و أكلتها و انا قاعد لحالي زي القرد و الحمد الله انو ما فكرت في طعمها اللي مش موجود اصلا و اللي نساني اياه 4 غربان كانو عم يحاولو يوصلو لقطعة كيك قريبة مني على الارض كل ما سنحت الفرصة يخطفولهم فتفوتة بس شكلهم كانو مبسوطين لانو اللي اكتشف مكانها عزم البقية عليها :) يا سيدي صحتين عليكم بس بلاش من اصواتكم اللي بتنقز . خلص عرفنا انكم غربان.

و بكرا اكيد مغامرة جديدة في البحث عن الاشي اللي ممكن يتاكل على أمل ان تجتمع اكبر عدد من العوامل اللي بتحلي طعمه اللي حلاوته اكيد مش في مكوناته بس في مغزاه.


وصحتين لكل اللي اتغدو اشي زاكي اليوم :)




هناك 3 تعليقات:

  1. جد غريبة , مع اني مرات بحب اكون لحالي وخاصة اني مغترب حاليا ولسه الاهل ما اجو , بس لما تيجي عند جزئية الاكل بالذات بحسها ثقيلة شوي مع انه الاكل طيب والمطاعم منيحة هون

    فا بحاول انه ما اروح اوكل لحالي

    "الله يرحم جدك اللي مش عارف ازا لحق الكستنة على الصوبة ولا لأ :)."
    ههههههههههههههه تحشيش

    ردحذف
  2. اهلا وسهلا فيك صديقنا سواح ...نورت العالم التدويني :)

    هلأ من لمّا بديت لشربت فنجان القهوه اخدت معك سنه و لنويت تتغدى اخدت معك سنتين...مش خبريه وضعك بالمره لترّوح عالبيت تنام بتكون زينه بنونه لصديقنا LUNAR هي اللي بتقرأ البوست


    الله خليك...بعثر و شعبر اسرع من هيك لانه ما معنى وقت كتير :)

    ردحذف
  3. هههه ضحكتيني يا وسبرد, ليش الاستعجال فش وارانا اشي :)

    وشكرا ع مرورك

    ردحذف