الخميس، 19 أبريل 2012

استراحة غداء

طلعت من المكتب الساعة 3 بعد الظهر على نية اني أكل اشي بعد ما اكتشفت اني جوعان و مش مجمع. طبعا في عندي 3-4 خيارات من المطاعم اللي حوالينا (الله يجعلها مطاعم) . و زي كل مرة ماشي و مش مقرر شو بدي ادضلغس  - كلمة معناها انو بدي اكل و مشا فراقة شو- المهم وصلت للمحل اللي في النصيب و برضو مش عارف شو بدي. بس لما شفت 3 شباب واقفين على الدور ليطلبو سندويشات على السريع قلت خلص هادي هي , خليني أعطيها شندويشات من الاشي اللي مش عارف شو هو.

استنيت الشبات لما خلصو طبعا بعد ما قززو أهلي على اساس انهم بفهمو بطعمة تمهم . وبلشو حطلي بندورة اه و حط شوية خس و بلاش مايونيز .. اه اه بليز توستد. توستد! الله يرحم جدك اللي مش عارف ازا لحق الكستنة على الصوبة ولا لأ :).

وبعد ما جهزت سندويشاتهم خربوها و اخدو بيبسسي. لأ واللي بضحك بطلعلك واحد فيهم بقول لا لا انا ما بشرب غازات. والله! من متى؟ الله يوفقك يا سيدي!
كل هاد الفيلم أخد ربع ساعة وانا واقف بتابع مش للإهتمام بس كنت زهقان و بدي اشي اتسلى فيه .و مع هيك قلت لتبع المطعم اعطيني زيهم بالزبط بس شو قال بدي اغير فرحت طلبتها بخبز ابيض بدال اسمر - يا سيدي علي و انا ديزيشن ميكر :)


سيبونا من كل هاللت و العجن اللي فوق. شو يعني انو انا بحب هاي الأكلة و ما بحب هديك؟ طب شو يعني أكلة صحية و أكلة لأ؟

طب احنا ليش بنغير الاكلة أو المطعم كل مرة؟ هل هية قصة فسيولوجية الجسم انه عشان التنويع ولا القصة قصة وين انا برتاح في الاكل! طيب نفس الاكلة الي بنحبها بفرق طعمها لما ناكلها لوحدنا عن لما ناكلها مع حدن بنعرفه, بنحبه, او بنرتاح معه! انا بشوف انه هاد هو التفسير. المكان و الزمان و الاشخاص همه اللي بيعطو الطعم للاكل. و اكيد أهم عامل هو الميزانية. يعني وقت الطفر تتلاشي كل هذه العوامل و بناكل هوا و بنعطيها فلافل او قلاية بندورة في البيت مع صحابك (هاد الحكي للعزابية و المغتربين :)

خلصت السندويشة الغريبة اللي طلبتها و أكلتها و انا قاعد لحالي زي القرد و الحمد الله انو ما فكرت في طعمها اللي مش موجود اصلا و اللي نساني اياه 4 غربان كانو عم يحاولو يوصلو لقطعة كيك قريبة مني على الارض كل ما سنحت الفرصة يخطفولهم فتفوتة بس شكلهم كانو مبسوطين لانو اللي اكتشف مكانها عزم البقية عليها :) يا سيدي صحتين عليكم بس بلاش من اصواتكم اللي بتنقز . خلص عرفنا انكم غربان.

و بكرا اكيد مغامرة جديدة في البحث عن الاشي اللي ممكن يتاكل على أمل ان تجتمع اكبر عدد من العوامل اللي بتحلي طعمه اللي حلاوته اكيد مش في مكوناته بس في مغزاه.


وصحتين لكل اللي اتغدو اشي زاكي اليوم :)




السبت، 16 يناير 2010

فنجان قهوة







طبعا دورت على صورة فنجان قهوة تركي بس ما لقيت, اعتبروها تركي
طول عمري بشربها وسط بس صارلي كام يوم بشربها سادة مش عارف ليش و الغريب
انها زاكية ! بين قوسين طيبة.  يمكن كنت احاول اتجنب مرارتها مع محاولة الاستمتاع بالطعم بس الظاهر انو احياناً بنلاقي الحلاوة في المرارة. مش المرارة اللي في الجسم, قصدي في القهوة و قيسوها على المواقف في الحياة. كيف انا معكم :)





هيك حسيت بمرارة الوضع لما الشركة اللي كت اشتغل فيها قررت تسكر فرعها اللي هون, و طبعا قالولي مع السلامة :)  قلتلهم الله يسلمكم طبعا.

اول يومين كنت لسا مش حاسس بالحامي, بس بعدها بشهر , بعد تعب مضني للبحث عن شغل و بدون فايدة, اكيد خف عقلي شوي. و هون بلشت افكر , ما تسألوني بشو. كنت افكر والسلام :)

في هيك مواقف بيحس الواحد, اللي هو انا, انو خلص ما في غير طريق واحد و تسكر في وجهو. بس القعدة بتعلم كمان, بنصير نشوف ونلاحظ افكار و اشياء كانت غايبة عنا لما كنا في نطاق الامان , يعني لما كنا في الوظيفة, و اهم شي انو هاي الفترة منيحة كتير لمراجعة الحسابات و تقييم الانجازات الشخصية.   يعني وين انا هلأ؟ شو حققت من اهدافي ؟ طيب هادا الي كان بدي اياه ؟ و من هالحكي.

بس الحمدلله على كل شي, مرارة الحياة طعمها حلو لما نفهم الاسباب ورا كل شي بصير معنا. و إلا ما ييجي الوقت اللي نعرف ايش احنا
مبدعين فيه و نستقل في حياتنا و نبطل موظفين عند الناس. طبعا. لما نكون بنشتغل لحسابنا اكيد بنحط كل طاقتنا و نفس الوقت بكون عنا فسحة حرية اكبر لحركنا


على العموم انا اكيد راح الاقي شغل انشالله, بس راح يكون البداية لمشروعي و شركتي الخاصة انشالله, ما تخافو بخبركم شو بصير معي اول باول :)

فنجان القهوة خلص, كان كتير طيب, يعني زاكي, و انشالله بشوفكم قريبا في قصة جديدة :)








الخميس، 10 ديسمبر 2009

بـداية


بداية كنت عم بدور على تنوين الفتح على الكيبورد بس للأسف ما لقيته, فيمكنكم قراءتها على انها "بدايتن".  ما علينا

قلت لحالي خليني اعمل مدونة خاصة فيي, و كل ما اكون زهقان و بدي ابعثر عن شعوري بفوت بكتب اللي فيه النصيب, فيها وجهة نظر صح؟
و كمان بكتب عن الاشياء للي ممكن تكون مهمة الي و الكم كمان , ولا تزعلو

يعني مع الايام رح تعرفو شو اهتماماتي اللي بداخلي , على اساس نها مدفونة !

اهلا و سهلا بالجميع و بستنى تعليقاكم المنيحة والمش منيحة , عادي محسوبكم بتفرقش معو و لا بزعل 


هلا هلا هلا